ATUR PAMBAGYO HARJO
Assalamualaikum wr.wb
Para sesepuh, pinisepuh,
saha para tamu ingkang winengku ing suka basuki. Keparengna kula nyigeg anggen
panjenengan sedaya ingkang katemben wawan pangandikan. Karana kula piniji
Bapa/Ibu Suroso kinen ngaturaken wigatosing gati ing kalenggahan menika.
Minangka
purwakaning atur mangga panjenengan sedaya kula dherekaken ngonjukaken puja
miwah puji syukur dhumateng Ngarsanaipun Gusti Allah ingkang sampun kepareng
maringi kawilujengan saha kasarasan dhumateng panjenengan sedaya lan kula
satemah saget hanjalari makempal silaturohmi saha paring donga pangestu
dumateng penganten sekaliyan.
Para tamu
ingkang winengku ing karahayon, madyaning pawiwahan ing dalu menika bapa/ibu Suroso lumantar kula
ngambali ngaturaken wilujeng rawuh sinarengan raos panuwun ingkang boten
pepindhan kasuwun tansah lelenggahan kanthi mardikaning panggalih.
Wondene
wigatosing sedya hambok bilih panjenengan sedaya sampun ngawuningani kadas
ingkang sampun sinerat wonten sedhahan, inggih menika Bapa/ibu Suroso netepi
darmaning asepuh mahargya suta ing ”Bayang Penganten/Pahargyan prasoja” dhaupipun
Bg. Andi Purwanto putranipun kakung Bapa/ibu Subagyo kaliyan Rr. Dwi
Pujianti putranipun putri Bapa/ibu Suroso.
Sampun
kalampahan ijab wanci tabuh 09.00 enjing miturut satataning agami islam kalajengaken
panggih miturut satataning adat kanthi panayungan karaharjan tebih ing
sambikala, ingkang menika panyuwuninpun bapa/ibu Suroso panjenengan sedaya
keparenga paring jurung puja hastawa puji hastuti dhumateng penganten sekaliyan
anggenipun badhe sami jejodhohan gesang bebrayan mugi tansaha bagya mulya
sembada ingkang sinedya cundhuk kaliyan kekudanganipun para pinisepuh ingkang
sami bebesanan.
Kajawi saking
menika bapa/ibu Suroso ugi ngaturaken panuwun ingkang tanpa umpami,
tumrap sedaya peparing pratandha sih ingkang nelakkaken agenging katresnan.
Hamung bapa/ibu Suroso sakulawarga ngrumaosi boten saget ngaturaken piwales
menapa-menapa. Sagetipun hamung sumarah lan nyenyuwun dhumateng Gusti Allah
mugi hamaringana kanugrahan minangka liru ingkang langkung bobot timbang
ingkang sampun panjenengan rilakaken kala wau.
Para tamu
kakung saha putri inkang sinuba ing pakurmatan bapa/ibu Suroso sakulawarga hambawabi
damel mawi atur-atur para priyagung, para kadang sumitra tresna , adhedhasar
rancangan ingkang kaangkah sageda handamel renaning penggalih ingkang sami
rawuh, suprandene dumugining damel sami dipun rumaosi tasih kathah sanget
kekiranganipun buja menapa dene krama, ingkang menika tumrap sedaya kawontenan
ingkang handadosaken kurang saruju minggahing cuwaning penggalih
langkung-langkung klinta-klintunipun para hamung tamu hanggening ngacarani
lenggahipun para priyagung sarta para tamu, kula suwun mugi keparenga hangluberaken
samudragung pangaksama. Ing wasana kula nglenggana hanggen kula hamakili bapa/ibu
Suroso tasih tebih saking jangkeping tata basa saha subasita hawit saking
menika mugiya kersa paring agunging pangaksama. Wilujeng lelenggahan sinambi
hamirsani pasugatan campursari ingkang dipun suhi kang mas Tedjo saking C.S.
Sangga Buana.
Wasalamu’alaikum
wr.wb
